Shaam thi Sa'at-e-Zawaal mein gum
Zakhm tha apnay indmaal mein gum
Had-e-Idraak mein Tha Jo bhi kuch
Sub Tha bus aik hi Sawaal Mein gum
Tez Aandhi mein kia charaagh ki lo
Barf mein kaisi Aabla Paaai?
Carnas mein thay phool sookhay huay
Seerhiyon mein bichi thi tanhai
Khawaab thay khirkiyon mein aawaizaan
Zeenat-e-Taaq thi shakeebai
Aik Na taaqati thi chaaron taraf
Raasta raasta thi paspaai
Kehkashaon ke darmiyaan Larzaan
Aik na mohtatim si pehnai
Faaslay thay faraib aankhon ka
Naapta kon Gham ki gehrai
Ik Guraizaan se aks ki khaatir
Ainay ho rahay thay sodai
Yoon sitaray thay muntazir jaisay
Dar-e-Mehboob per tamannai
Waqt tha roz-o-Shab ki chaal mein gum
Mein tha apnay kisi khayaal mein gum!

(Amjad Islam Amjad)